Golfklúbbur Mosfellsbæjar leitar að nýjum rekstraraðila veitinga á völlum klúbbsins

GM auglýsir eftir nýjum veitingaaðila á golfvelli klúbbsins, Hlíðavöll og Bakkakot.

Karl Ómar Jónsson og Jón Óskar Karlsson sem hafa verið með veitingareksturinn undanfarin tvö ár hafa óskað eftir því að stíga til hliðar og færum við þeim bestu þakkir fyrir gott og farsælt samstarf þessi tvö ár.

Rekstur veitinga er því laus til umsóknar.

Golfklúbbur Mosfellsbæjar er með tvo golfvelli, annars vegar Hlíðavöll og hins vegar Bakkakot. Á Hlíðavelli er glæsileg Íþróttamiðstöð ásamt veitingastaðnum Blik Bistro sem er vinsæll og vel sóttur af kylfingum sem og öðrum gestum. Í Bakkakoti er klúbbhús sem opið er yfir sumartímann. Þar er fínt eldhús þar sem boðið er upp á veitingar. Gerð er sú krafa að sami rekstraraðili sé á báðum okkar golfvöllum.

Óskað er eftir eftirfarandi upplýsingum frá umsóknaraðilum:

1. Matseðli ásamt verðum, tillaga að seðli með fjölbreyttum veitingum sem henta okkar meðlimum í GM, öðrum golfurum sem og öðrum gestum.
2. Upplýsingar um fyrri reynslu við rekstur sambærilegra veitingastaða og hvernig viðkomandi sér reksturinn fyrir sér.
3. Hugmyndum sem gera okkar veitingastaði/klúbbhús eftirsóknaverðari fyrir okkar meðlimi sem og aðra gesti ásamt framtíðarsýn.
4. Þeim hugmyndum um þjónustu/þjónustustig og ímynd sem viðkomandi sér fyrir sér varðandi veitingarreksturinn á Hlíðavelli og í Bakkakoti.

Golfklúbbur Mosfellsbæjar þjónar breiðum hópi kylfinga. Lögð er áhersla á fjölbreyttan matseðil og heilsusamlega kosti. Þá er mikilvægt að breiðum aldurshópi sé sinnt vel og að komið verði til móts við okkar félaga sem og aðra gesti með háu og góðu þjónustustigi.

Allar nánari upplýsingar veitir Ágúst Jensson, framkvæmdastjóri GM í síma 8577009 eða í gegnum tölvupóstfangið agust@golfmos.is

Umsóknarfrestur er til og með 31. ágúst næstkomandi og skal umsóknum skilað á agust@golfmos.is

Golfklúbbur Mosfellsbæjar.